Sustatun irakurri berri dut WordPress blogak egiteko softwarearen euskarazko lokalizazioa prest dagoela eta horren berri eman nahi izan dut lehenbailehen. Magic eta Jolausi entzunda, banekien hemendik gutxira prest egongo zela, baina ez nuen uste hain azkar erabiltzeko moduan egongo zenik eta, hurrengo ikasturtera begira blog bat martxan jartzen ari naizenez, asteburu osoa pasa dut, beste gauza batzuen artean, blog horren atalak itzultzen!! Nahiz eta hemendik aurrera blogak egiteko tresna euskaraz egon, espero dut pasatako ordu guztiak zerbaitetarako balio izango zutela, besterik ez bada blogaren erraiak hobeto ezagutzeko…
Bestalde, aipatutako artikuluan esaten da balitekeela produktu euskaldun hau UEUko Iruñeako ikastaroetan Patxi Gaztelumendik blogintzari buruz eman behar duen zikloan aurkeztea (nahiz eta oraingoz blog horiek ingeleseko interfazearekin eginak dauden), eta hori bai ondo legokeela; izan ere, nik atzo bertan eman bainuen izena UEUk antolatutako ikastaro horretan.
Beraz, berri onak ditugu euskara eta teknologia batzen saiatzen ari garenok!! Informazio gehiago nahi izanez gero (nork egin duen, erabili den itzultzailea, non lor daitekeen…), bertara jotzea besterik ez duzue. Nik, nire aldetik, ikastarotik ateratzen ditudan aprendizaiak zuekin partekatuko ditudala zin dagizuet. Hori bai, pixka bat itxaron beharko duzue berau uztailaren amaieran delako… Non scholae sed vitae discimus.
Zabaldu
Spanish
patxi gaztelumendi(e)k zera dio:
Ikastaroan Wordpress 1.5 euskaratua aurkeztuko da bai, halan da. Hiru eguneko ikastaroa izango da, eta bigarren eguna izango da pratikoena. Goizean mahaingurua egin ostean, plataforma ezberdinak ikusiko ditugu.
Coreblog dagoeneko euskaraturik dago, eta orain Wordpress euskara dagoela profitatuta, itzulpen lanetan ibili den lagun batek, hori aurkeztuko du.
UEUko ikastaro honetarako blog txiki bat antolatu dugu, doako hoietako bat, ikusteko zeinen erraza den, zeinen aproposa blog logika hau, blogika.
Aurrerantzean, blog gehiago sortuko dira, asko eta asko euskarazko softwarearekin, eta hori izango da gu guztion asmoa.
Ikastaroan izango dugu elkarren berri, eta hango eztabaidak, gogoetak eta asmo berriak nork bere blogean plazaratuko ditugu. Noski!
Bitartean, IKTeroen proposamen hau aitzindaria da hezkuntza mailan. Aipagarria eta ederra, zinez.
Txopi(e)k zera dio:
WordPress programaren inguruan euskal komunitate bat sortu berri da, WordPress-Eu:
http://librezale.org/wordpress-eu/
Webgune honek euskaraketak, galderak eta erantzunak, theme berriak, etab. ditu mintzagai.