Aurreko batean, gelara eramandako bi esperientzien inguruan aritu nintzen: webquestions 2.0ren euskaratzeaz eta writelyren erabilera praktikoaz. Bi lanketa horiekin jarraituz, urrats batzuk aurrera ematen hasi nintzen.
Webquestions 2.0rekin egindakoa azalduko dizuet oraingoan. Mota ezberdinetako ariketak sortzeko aplikazio hau gelan itzuli eta berehala erakutsi nien nire ikasleei emaitza, egindakoaren garrantziaz ohar zitezen: euskararen presentzia sarean zehar hedatzen lagundu dute! Asko gustatu zitzaien ikustea eurak egindako lanak aplikazio erabat praktikoa zuela eta denon eskura jartzean, edonor has zitekeela berau erabiltzen. Beraz, momentu ezinhobea iruditu zitzaidan hurrengo urratsa aurkezteko: guk euskaratutako aplikazio hori ariketak sortzeko erabiliko genuen, honela, programaren itzulpena egiteaz gain, berarekin sortutako ariketa horiek ere denon eskura jarriko genituen. Hori ere gustuko izan zuten. Behin baino gehiagotan hitz egin dizuet nire ikasleen jarrera irekiaz, ezta?? 
.
Gauzak horrela, eta azkenaldi honetan behin baino gehiagotan hizpide izan dugun euskararen maila dela eta, hizkuntzari horrelako ukitu jator eta aberatsa ematen dioten esamoldeak lantzeko galdeketak sortzea egokia izan zitekeela pentsatu genuen. Abiapuntua uema.org-etik ateratako Gaztelaniazko Esamoldeak Euskaraz pdf artxiboa izan zen. Izan ere, ez dakit beste tokitan gertatuko den, baina inguru honetan, nahiz eta euskaraz hitz egin, askotan jo ohi dugu gaztelaniara horrelako esapide edo lokuzioak adierazteko.
Ondorengo pausoa ikasle bikote bakoitzari hizki bat egokitzea izan zen. Hizki horrekin hasten diren esamoldeetatik 20 inguru hautatu behar zituzten eta erantzun zuzena markatzeaz gain, beste hiru asmatu behar zituzten erantzun anitzeko galdeketak sortzeko. Aplikazioaren funtzionamendua azaldu ondoren, denok martxan jarri ginen. Puntu honetan, ikasturte hasieran ipinitako hainbat helbururekin bat egin genuen: euskara hizkuntza bezala landu, ikasleen sormena eta autonomia sustatu, talde-lanean trebatu (kooperazioa), euskararen presentzia sarean zabaltzen lagundu, eta, batez ere, euskara eta teknologia berriak uztartu.
Lehengo egunean ikasleek sortutako jarduerak sarean ipini nituen eta hantxe egon ginen denok denonak egiten. Esamolde horietako hainbat ez genuela ezagutzen onartu beharrean gaude. Orain, bakarren bat gehiago ezagutzeaz gain, erabiltzeko bidean ere jarri gara! (Entzun egin behar ondorengo egunetan nola aritu diren!). Dena den, egin duguna neguko lorea izan ez dadin, kontsultarako non gelditzen diren aipatu ostean, bakoitzak bere zerrendatxoa osa dezala eskatu diet (hurrengo idatzian horrelako bat edo beste ikusi nahi dudala garbi dute!).
Nik ere zerbait eman nahi nuela eta pdf dokumentu osoa hizkiz hizkiko tauletan xehatu dut esamoldeen bilaketa errazteko. Honetan, beste hainbatetan bezala, magic-en laguntza ezinbestekoa izan da. Nire hasierako taulak batere gustatu ez (egia esan, ez ziren batere irisgarriak!) eta bere izate kritiko bezain eraikitzaileari jarraiki, beste taula mota baten CSS eta HTMLa eskaini zizkidan (scroll eta guzti!!!). Mila esker, magic, zure ekarpen (eta ordu) guztiengatik.
Lanketa eta lankidetza (ikasleak, IKTeroak, irakaslea…) honen guztiaren emaitza euskaljakintzan sortutako bi atal ezberdinetan topa dezakezue (eskuineko zutabean):
1. Esamoldeak hizkiz hizki eta hizki horri dagokion ikasleek ekoiztutako galdeketa (galdera ikurrak klikatuz).
2. Galdeketa guztiak A-Z itxuradun taula batean.
Beraz, gaurtik aurrera, baliagarri gerta dakiokeen edonorentzat hortxe gelditzen dira.
Zabaldu
Luistxo Fernandez(e)k zera dio:
Orri honetan aurkitzen dudana ez dut ondoegi ulertzen. Atal honetan esamoldeak lantzeko erantzun anitzeko galdeketak topatuko dizuzue, dio, baina ez dut halakorik ikusten (nabigatzaile akatsa da?), soilik barra alfabetikoa ikusten dut (gaztelerazko aurkibidea, alegia), eta irudi batean euskarazko esaldi batzuk. Oker nabil zerbaitetan?
21 hours igaro dira mezua idatzi zenetik.sei(e)k zera dio:
Aupa, Luistxo! Zuk aipatzen duzun orri horretako letra bakoitza klikatuz, ariketa batzuk zabaltzen dira (webquestions 2.0rekin sortutako ariketak.Ariketa horiek nire ikasleak sortutakoak dira, esamoldeak lantzeko. Esaidazu, mesedez, ez badituzu ikusten. Kontua da, gu nabigatzaile ezberdinekin egin dugula proba eta denetan ondo ikusten dela.
Laburtuz, alde batetik, letra bakoitzetik hasten diren esamoldeak topatuko dituzu taula batean (teoria eta praktika); eta, bestetik, ariketa guztien bilduma.
23 hours igaro dira mezua idatzi zenetik.Eneko(e)k zera dio:
Bai, bai. Nik mozilla eta explorererrekin frogatu dut eta ondo ikusten da. Itxura ona dauka.
Ariketak webquestions-ekin daude eginak, ezta? Baina, nonbaiten klikeatu egin dut eta beste galdetegi mota batean sartu naiz … eta orain ez dut aurkitzen
Galderak banan-bana zeunden, denbora neurtzen zuen, zenbat asmatu dituzun eta zenbat ez erakusten zuen, ….
mila esker
1 day igaro dira mezua idatzi zenetik.sei(e)k zera dio:
Aupa, Eneko! Bai, ariketa gehienak webquestions 2.0rekin eginak daude. Pentsatu nuen ikasleei beraiek euskaratutakoarekin aritzea ilusio berezia egingo ziela eta horregatik hasi ginen horrekin. Baina, horretan ari nintzela, Multiple Choice Generator-en berri izan nuen (zuk esaten duzun beste hori, denbora duena…).
Nire ustez, azken hau erakargarriagoa da eta hemendik gutxira, aplikazio honekin sortutako ariketa gehiago aurkeztuko ditut (sinonimoak lantzeko prestatu ditugun ariketak). Dena den, esamoldeetan N eta P hizkietan sartzen bazara, horrelakoak topatuko dituzu (horiek izango dira seguruenik lehen ikusi dituzunak).
Bestalde, aplikazio honen inguruko informazio gehiago nahi izanez gero, hementxe klikatu.
1 day igaro dira mezua idatzi zenetik.Eneko(e)k zera dio:
Bale, bale, N eta P dira hizki bereziak
joe, ez nuen asmatzen non arraio klikatu egin dudan ariketa berezi horretan (Multiple Choice Generator) sartzeko.
Mila esker! eta aupa zuek!!
1 day igaro dira mezua idatzi zenetik.Luistxo Fernandez(e)k zera dio:
Orain, bai, baina zin dagit goizean klikatzen nuenean, adibidez, A letrari dagokion ariketan, ariketa barik hauxe azaltzen zitzaidala. Zorionak lan honengatik, bihar Sustatun aterako dugu. Ez ahaztu Donostiako ume gaixoek zuen partikularren beharra dutela
1 day igaro dira mezua idatzi zenetik.