IKTeroak

RSS jarioaren ahalmenari buruz nik uste dut dena esanda dagoela eta ez naiz ni hemen hori gogora ekartzen berriro hasiko, baina, tarteka, ematen dizkidan ustekabeak ez dira nolanahikoak.

Gaur bertan, nire jarioak arakatzen ari nintzela, del.icio.us/rss/tag/euskara ireki eta hara non topatzen dudan Lagun 2.0 izeneko gune bat. Ez du inongo azalpenik, hau bakarrik:

Por: jiivaatmaa el euskara słowniki … posted by jiivaatmaa to euskara słowniki… bookmark this

Eta ikusminez bertara joan naiz. Zer arraio ote da hori? Arrotza egiten zitzaidan hizkuntza baten aurrean nengoen, nahiz eta euskaraz idatzitako esaldi labur batzuk ere agertzen ziren. Webaren helbidean hiztegia.org irakurri dudanean, ohartu naiz hiztegi bat online izan zitekeela. Gero, pol - eus ikustean, Poloniera - Euskara eta Euskara - Poloniera hiztegi baten aurrean nengoela jabetuta, Hiztegia.net-era jotzea erabaki dut. Arrastorik ere ez. Sekula ez dut ezer entzun honi buruz eta hiztegia.net-en ez dago jasota. Berria izango ote da? Nire jakinahia areagotzen ari zen eta zerbitzu ezberdinetan bilaketak egin ondoren, whois.net-en bilatzea erabaki dut. Hortxe, zalantza batzuk argitu zaizkit. Orain, badakit Polonian erregistratutako domeinua dela ( Tagzanian berehala kokatu dut bere hiria ) eta bere egileak, Kamil Sobczak-ek, Euskal herriari buruzko Haritz izena duen eta hizkuntza ezberdinetan (Alemana, Frantsesa, Ingelesa, Gaztelera eta Poloniera) eginiko gune bat duela eta bere del.icio.us-en hizkuntza ezberdinei buruzko esteka ugari jasota duela.

Nire jakin-mina asetuta, Lagun 2.0 izeneko hiztegia frogatzen hasi naiz eta honako gauza hauek topatu ditut bertan:

• Bilaketa pluginak Firefoxerako (Pol-Eus eta Eus-Pol)
• Hiztegia PDF formatuan (Pol - Eus eta Eus - Pol)
• Azken hau, hanka sartze larri bat egiteko arriskuaz (ez baitut poloniera ulertzen), erabiltzaileek terminoak gehitzeko aukera.

Beraz, badakizue, egungo Internetek eskaintzen dizkigun baliabieekin, abiapuntua edozein izanik ere, detektibe lan txiki batekin, edozein tokira irits zaitezke. Gaur Poloniara, bihar batek daki nora eramango nauen eta zein mundutan murgilduko naizen.

Hori ere Web 2.0 izango da, ezta?