Ia ahaztuta geunden DBH 2ko ikasleekin, baina hauetako batzuek jarraitzen dute, nahiz eta ikastolan ez landu, euren blogeetan argitaratzen. Zorionak.

Izan ere, mezu honetan kontatzen diguzuen guztia berria ez izan arren, bai, ordea, zuen jarrera eta lanketari eman diozuen ikuspegia.

Orain arte, edozein lanketa, edozein proiektu… munduko altxorrik preziatuena bailitzan gurean gordetzen genuen. Oraingo honetan, berriz, lanketa hau prestatzen ari zenean etapako irakasle batek esatea esan zuena oso adierazgarria da:

Zergatik ez dugu lanketa hau interneten jartzen? Gure ikasleek eta gurasoek eskertuko dute eta, bide batez, beste ikastetxe batentzat baliagarria suertatzen bada, hainbat hobe. Asko dira ahozkotasun jarduerak antolatu nahian dabiltzanak eta kosta egiten zaie aurrera egiten, ez baitute, idatzizko jardueretan duten bezala, erreferentzia garbirik.

Hori oso pozgarria izan bazen ere, askoz ere pozgarriagoa izan zen gainontzeko irakasleen erantzuna: aho batez baiezkoa eman zuten eta, hori bai, IKT taldearen laguntza beharko zutela garbi adierazi zuten (batzuk ez baitira oraindik gai sentitzen gisa honetako muntaketa laguntzarik gabe egiteko).
Partekatzearen filosofia barneratzen ari da? Horrenbeste errepikatu dugun mezuak oihartzuna du gure ikastolako irakasleengan? IKT taldekook gure adibidearekin falta zitzaien ausardia eman diegu? Ez dakit, baina aurrerapauso garrantzitsua da, ene iritziz, eta hemendik animatu nahi ditut gure ikastolako eta beste ikastetxeetako irakasleak bide honetatik jarraitzera eta guztion esperientziak partekatzera. Gauzarik xumeena izanik ere, ziur baten batek etekina aterako diola.
Ea denon artean, hezkuntza komunitate sendo bat osatu eta gure gizarteari zerbitzu hobe eskaintzeko gai garen.