Gauzak horrela, lokailuetara iritsi aurretik, perpaus elkartuak bere osotasunean errepasatzeari ekiten diogu guk. Zer dira perpausak? Zein da perpaus bakuna eta elkartuaren arteko ezberdintasuna? Zenbat motatako perpaus elkartuak daude? Nola bereizten dira? Juntagailuak eta lokailuak gauza bera al dira? Antzeko galderak egiten badizkiegu ikasleei, berehala konturatuko gara nahasketa handia izaten dutela kontzeptu ezberdinak bereizteko orduan, aurreko ikasturteetan ikasiak dituzten arren.

Sailkapen guztiak bere tokian berrezarri eta, bereziki, Hautaprobetako jarduera hori prestatu nahian, perpausen arteko loturak landuko dituzten ariketak sortu ditugu. Beti bezala, gure lan egiteko filosofiari jarraituz, errepaso ariketak guk geuk sortu eta sarean ipini ditugu erabili nahi dituen ororentzat.

Zer sortu dugu eta non topa daiteke?

Perpaus elkartuak: pratika. Egin klik euskaljakintzako ariketa bilgunean, eskuineko zutabeko 2. estekan, eta hortxe ikusiko dituzu orain arte sortu ditugun ariketa guztiak alfabetikoki antolatuta. Sorta hau Perpaus elkartuak atalean dago. Hemen juntadura, menperakuntza eta testu mailako loturak (hauxe da Hautaprobetan eskatzen den jarduera mota) lantzeko ariketa ezberdinak topatuko dituzu.

Perpaus elkartuak: teoria. Egin klik euskaljakintzako kontsultagunean, eskuineko zutabeko 4. estekan. Alfabetikoki antolatutako zerrenda luze bat zabalduko zaizu. Atal honi Perpaus elkartu motak izena eman diogu. Hemen juntadura, menperakuntza eta testu mailako loturari buruzko azalpenak topatu ahal izango dituzu. Halaber, aurreko guztia begi-kolpe batean ikusteko aurkezpentxo bat aurkitu duzu.

Ariketa sorta honekin aurtengo ariketa sortze-lanari amaiera eman diogu. Aurreko ebaluazioetan egin ditugunak ikusi nahi badituzu, egin klik hurrengo esteketan:

Deklinabidea lantzeko ariketa sorta
Aditza lantzeko ariketa sorta (aditzaren gunea)

Ariketak

Ikasleek bikoteka egin dute lan, bikote bakoitzak bi ariketa mota sortuz:

• Zehatzak (aditz-mota, aldi eta modu jakin bat lantzeko balio dutenak)
• Orokorrak (edozein aditz-mota, aldi, modu, pertsona eta numero lantzeko baliagarriak direnak).

Gune berria

Ariketa horiek guztiak Euskal aditz laguntzailea deritzon gune berri batean kokatu ditugu.

Gune horretan, ariketekin batera, beste baliabide batzuk topatu ahal izango dituzu:

Taulak:

Sor dakizkigukeen zalantzak argitze aldera, aditz-taula guztiak ipini ditugu kontsultagai. Goiko barran, dagokion moduan (indikatiboa, baldintza, ahalera, subjuntiboa eta agintera) klik eginez, topatuko dituzu.

Horietaz gain ondorengo taulak ere aurki ditzakezu:

• Aditz laguntzailea eskematikoki (pdf)
• Aditz guztiak (trinkoak eta perifrastikoak)

Teoria:

Aditzari buruzko oinarrizko informazioa ipini dugu aurreko guztiari laguntzeko.

Gaurtik aurrera, gune berria osorik euskaljakintzako kontsultategian izango duzu eskura eta ariketen orria, berriz, euskaljakintzako ariketen atalean (biak eskuineko zutabean). Lagungarri gertatuko zaizuelakoan…

Duela urte pare bat hasitako EGA ikastaroa osatzera datorren atal berri hau bereziki aproposa gerta dakioke hurrengo deialdian aurkezteko asmoa duen orori. Ez dago esan beharrik, batez ere, nire ikasleei begira egindako lana izan dela; izan ere, gogor ari dira EGAko azterketa prestatzen eta, lanketa horretan ari direla, askotan eskatzen dizkidate jarduera gehigarriak. Argi dago honekin bakarrik ez dutela agiria lortuko; dena den, bidea erraz dakiekeela ere zalantza izpirik ez dago. Pasa gaitezen, bada, atalez atal sarean jarritakoa aztertzera.

Guztira lau atariko proba (2005eko otsailaren 26 eta irailaren 24koak) eta idatzizko 6 azterketa (2005eko martxoaren 12, maiatzaren 28 eta urriaren 10ekoa eta 2006ko martxoaren 11, maiatzaren 27 eta urriaren 7koa) topa ditzakegu.

Atarikoak:

Bi modutara egin daitezke:

• Osorik (ikus adibidea): azterketan atera ziren bezala.
• Entzutezko ulermenik gabe (ikus adibidea): batzuetan nahikoa izaten da entzutezko ulermena behin bakarrik egitea; beraz, errepikatu nahi ez duenarentzat, entzutezko ulermena kendu eta, horren ordez, beste atariko proba batetik ateratako hainbat galdera erantsi dugu. Honela, saiakera bakoitzean azterketaren hurrenkera aldatu egingo da, hau da, galdera guztiak eta baldineko erantzunak hurrenkera zehatzik gabe azalduko dira.

Idatzizkoak:

• Ahozkoaren ulermena (ikus adibidea): entzun eta aukeratu galdera bakoitzaren erantzun zuzena. Entzumena nahi denean geldi daiteke, baita nahi adina entzun ere.
• Idazlana (ikus adibidea): oraingoz ez dago berrikuntza handirik atal honetan, pdf formatura pasatu besterik ez baitut egin. Inprima daiteke eta proposatutako gaien inguruko informazio gehigarria lor daiteke. Horretaz gain, idazlana egiteko eman beharreko urratsak eta jarraibideak irakur daitezke.
• Esaldiak berridatzi (ikus adibidea): atal hau sareratzeko, aurreko batean adierazi nuen legez, hainbat zailtasun izan ditut. Erantzun bat ontzat eman ahal izateko, esaldi osoa ongi idatzi behar da (puntuazioa eta guzti). Beraz, gerta daiteke erantzunen bat ondo egotea eta zuzentzaileak erantzun hori ontzat ez ematea, nahiz eta erantzun egoki ezberdinak ematen saiatu naizen. Zailtasunak zailtasun, errepaso moduan ondo etor dakiguke (besterik ez bada, erantzun zuzenak ikusi eta beste baterako ideiak hartzen joateko).
• Sinonimoak: atal hau bi modutara egin daiteke. Batetik, testuingururik gabe (ikus adibidea), bi zutabe ezberdinetako sinonimoak lotuz; eta, bestetik, azterketan atera bezala (ikus adibidea), hau da, markatuta dauden hitzen sinonimo bana jarriz (testuinguruko esanahia errespetatu eta atzizki bera jarri behar da). Atal honetako erantzunetan ere ahalik eta sinonimo gehien ipintzen saiatu gara; dena den, sinonimoen eremua hain zabala izanda, logikoa den bezala, gerta daiteke ondo dagoen erantzunen bat zuzenketak ez onartzea.
• Irakurmena (ikus adibidea): testu bat arretaz irakurri ondoren, eskuinean datozen galderak erantzun behar dira. Erantzun ezberdinen artean hautatu behar da.

Esan beharra dago, nabigatzaileen baitan, hainbat arazo sumatu dugula ariketak irekitzeko orduan. Badirudi, Firefoxekin ez dagoela inongo arazorik. Internet Explorerekin, aldiz, atariko probak eta entzutezko ulermenak ez dira zabaltzen (javascript-arekin arazoren bat dagoela dirudi). Dena den, saiatuko gara hori lehenbailehen konpontzen.

Amaitzeko, gogoeta txiki bat. Azterketa hauek guztiak sarean jartzea ondo dagoela iruditzen zait, aurrerapauso bat dela ezin ukatu (mila esker baimena emateagatik). Zoritxarrez, egin zitekeenarekin alderatuz, ez da ezer. Azterketaz azterketa datu guztiak sartzea nahiko pisutsua gertatzen da eta, gainera, lortutako emaitza nahiko mugatua da. Hau da, lau atariko eta sei idatzizko besterik ez. Baina imajinatzen duzue, gaur egun dauden baliabideekin, zer egin zitekeen orain arteko azterketen datu-base osoarekin? Azterketa konbinazio amaigabea, sailkapen ezberdinen baitako azterketak (morfosintaxia lantzekoak, gramatika, hiztegia eta bestelakoak), azterketa pertsonalizatuak… Izugarria izan zitekeen! Amesten jarrita, imajinatzen duzue datu-base hori gure esku jarriko balute? Axularreko lagunekin aspaldi hitz egin genuen aukera hauei guztiei buruz (duela gutxi beste foro batean ere hasiak gara honen inguruan lanean) eta nik uste dut iritsi dela gaiari seriotasunez heltzeko garaia. Beraz, gure hurrengo urratsak bide horretatik joango dira. Iradokizun guztiak, beti bezala, ongi etorriak izango dira. Ikusten duzue bestelako aukerarik?

Gure ikastolan euskararen erabilera sustatzeko erabiltzen ditugun leloetatik gehien gustatzen zaidana honako hau da: “Maita nazazu gutxiago ta goza nazazu gehiago”. Gaur goizean, Goierriko Hitzan gure herriko beste ikastetxeak bihar egingo duen ospakizunaren berri irakurri dudanean, mila gauza etorri zaizkit burura. Zer arraio ari gara egiten gure hizkuntzarekin? Ospakizunetan bakarrik gogoratu behar dugu euskaldunak garela eta euskara gure hizkuntza dela? Zer arraio egiten dugu gainontzeko 364 egunetan?…

Eta neure buruari galdera horiek guztiak, eta beste batzuk gehiago egin ostean, Euskal Herriko ikastetxe guztientzako gogoeta txiki bat egin nahiko nuke. Abenduaren 3an Euskararen Nazioarteko Eguna ospatuko dugu eta abenduaren 4a iritsiko da. Orduan, zein izango da euskarari egingo diogun ekarpena?

Arlo eta esparru askotan egin dezakegu euskararen aldeko lana, baina gu, sare honetan murgilduta gabiltzanok, gainontzeko 364 egun horietan bakardade handia antzematen ari gara. Beste ikastetxeen berotasuna nahi genuke, ezagutza partekatu nahi genuke, euskaraz ekoiztutako edukiak sortu eta zabaldu nahi genituzke, gure esperientziak trukatu eta elkarrengandik ikasi nahi genuke, euskal hezkuntzaren sarea osatu nahi genuke… Horretarako prest?

Tira, abenduaren 3an ospatu eta gozatu, baina asteartetik aurrera ea animatzen garen eta Interneteko esparru honetan euskararen eta euskal hezkuntzaren aldeko elkarlana burutzeko gai garen. Guztion mesederako izango da, baita euskarari laguntza eta bultzada paregabea emateko aukera bikaina ere.

Eguneraketa: Gure ikastolako Giza eta Gizarte Zientzietako irakasleek duten blogean ENEriburuzko mezu interesgarri bat argitaratu dute.

Maite eta bere ikasleek hitzetatik ekintzetara pasatzeko asmoa azaltzen dute Euskaljakintzako mezu honetan.

Eta gure ikasleek eginiko grabazioa eta bideoa ere jartzen dizuegu:

Kaixo! Alan R. King dut izena. Euskal Herrian bizi naiz. Beste herri hauetan ere bizi izan naiz noizbait: Katalunian, El Salvadorren, Estatu Batuetan, Galesen eta Ingalaterran (azken honetan jaio nintzen). Hizkuntzalaritza ikasi nuen Estatu Batuetan eta Inglaterran. Zenbait liburu eta abar idatzi ditut, gehienak euskarari buruz edo nawaterari buruz.

Herri eta hizkuntza txiki, baztertu, minorizatu eta zapalduen askatasuna, garapena eta eskubide guztiak defendatzeko, eta batez ere berauen berri emateko, ahaleginak egin eta egingo ditut neure bizitzan zehar, ditudan baliabideekin, eta Wikipedian ere horixe egiteko asmoarekin nator.

Hizkuntzalaria naiz formazioz eta izatez. Gainera, esperientzia ugari daukat hizkuntz irakasle eta itzultzaile bezala. Nire kontura lan egiten dut eta une honetan ez nago erakunde akademiko batean.

Nire interesguneen artean, hizkuntzen ikerketa eta hizkuntzen irakaskuntza dira aipatzekoak, eta nire lan askoren enfokea, modu batean edo bestean, munduko hizkuntza txiki, minorizatu edo arriskupekoak ezagutu, landu eta babesteko ahaleginetan zentratu da.

Del.icio.usen jasotako erreferentziei erreparatuz (hogeita hamar laster-marka eginda daude dagoeneko eta denak azaroan) proiektua nahiko berria dela dirudi.

Tira, ez nago ni oso bustita filologia eta hizkuntzalaritza kontuetan baina, lehen begiratu batean, proiektu interesgarria dela iruditu zait. Zuetako norbaitek ba al du honen inguruko berri gehiagorik?

Gauzak horrela, ikasleak dira gerora errepasorako baliagarriak suertatuko zaizkigun jarduerak, prozesu zirkular batean, ekoizten dituztenak. Zehatzago esanda, deklinabidea lantzeko ariketa-sorta prestatu dugu, arestian aipatutako lan-metodologiari jarraiki, 1go ebaluazioan. Ondorengoak dira eman ditugun urratsak:

Bikote bakoitzak bi jarduera ezberdin prestatu ditu. Bata, arazotsuak gertatzen diren deklinabide kasu zehatzak lantzeko (partitiboa, mugagabea, noraino/noiz arte…) eta, bestea, deklinabidea nahasian jorratzeko. Oraingo ariketa sorta honetan, gainera, berrikuntza nabarmen bat sartzen saiatu gara: feedback edo laguntza atala bete dugu. Honela, ariketa gaizki egiten duen edonork hutsegitearen arrazoia ezagutzeko aukera izango du azalpen labur baten bidez.

Bestalde, hauexek izan dira ikasleen ekoizpenak baloratzeko irizpideak:

• Ariketaren zuzentasuna: egin dituzten akatsen kopurua eta larritasuna.
• Edukiaren maila: ez du berdin balio hutsunea betetzeko ariketa batek (esaldi bakar bat asmatu behar da) edo aukera anitzeko galdera batek (lau esaldi ezberdin aukeran).
• Feedback edo laguntzaren baliagarritasuna: azalpen lagungarriak eman dituzten edo animoak ematera mugatu diren.

Amaitzeko, hauxe da euskaljakintzako ariketa atalean, deklinabide azpiatalean, gaurtik aurrera topatu ahal izango duzuena:

• Arazotsuak gertatzen diren deklinabide-kasuak lantzeko ariketak: -entzat/-entzako, izen bereziak, mugagabea, noraino/noiz arte, norekin/zertaz, nor/nork eta postposizioak (ikus adibidea).
• Deklinabide ariketa orokorrak: deklinabide kasu eta arazoak nahasian lantzeko jarduerak (ikus adibidea).
• Deklinatzeko ariketak: hutsuneak betez, dauden deklinabide mota ezberdinak praktikatzeko jarduerak (bokalez/kontsonantez amaitzen diren izen arrunt/berezien deklinabidea, bizidun/bizigabeen deklinabidea… ikus adibidea)
• Gaiaren inguruan sarean topatutako hainbat material: apunteak, taulak eta besteen ariketak.

Zuei ere baliagarri suertatuko zaizkizuelakoan…

Aurreko mezu batean adierazi nuen bezala, uda honetan hortik zehar barreiatua nuen materiala bildu, antolatu eta osatzeari denbora pixka bat eskaini diot. Horrela, iaz prestatutako EGAko ikastaroari zer erantsi edo zer kendu pentsatzen ari nintzela, ikastaro osoari ukitu ezberdin bat ematea eta beste plataforma batean kopiatzea erabaki nuen. Moodle plataforma egokia da ikasle talde bat kudeatzeko, txostenak jasotzeko, foroan zalantzak eskegitzeko, azterketen emaitzak jasotzeko…hitz batean esanda, elkarreragiteko, baina kontsulta eta ariketak baino ez egiteko, egokiagoa eta erabilerrazagoa izan daiteke beste formaturen bat. Hobeto ulertzeko erabakia azken urtean ikastaroaren inguruan gertatutakoa azalduko dut.

Hasteko, esan beharra daukat oso pozgarria izan dela ikustea zenbat jendek eman duen izena Moodle-eko EGA ikastaroan abian jarri genuenetik. Horietako batzuek, gainera, nire ikasleentzat sortutakoa zela jakin gabe, bertako jarduerak egiteaz gain, ea idazlanak zuzendu eta jarraipena egingo nien eskatzen zidaten. Gustatuko litzaidake, noski, baina ezinezkoa zait (nahiko lan nire ikasleen guztia zuzentzearekin!). Hori dela bide, eta gaizki-ulertzeak saihesteko, beste formatu batera pasatzea ondo legokeela pentsatu nuen. Banuen Moodle-eko ikastaroan izena emateko aukera ixtea eta listo, baina kontsultarako bakarrik izanda eta kontuan harturik nahiko mantso dabilela (ez dakit zein arrazoirengatik), taxuera egokiagoak egon zitezkeela pentsatu nuen.

Honela, bloga eta wikia baztertuta, ikastaroa gune estatiko batean klonatzea erabaki nuen. Hemendik aurrera, beraz, bi aukera izango dira: berritzen ari garen Moodle plataformako ikastaroa (nire ikasleentzat egokiagoa) eta Google Page Creator-ekin sortutakoa (kontsultarako aproposagoa eta azkarragoa). Ikastaro berrira zuzenean sartzeko, egin klik hemen. Euskaljakintzatik ere hel zaitezkete azal-orrian (goialdean) dagoen EGA erlaitzean klik eginez.

Sarrera orriaren antolaketa

• Jakingarri guztiak: azterketaren azalpena , egutegia, noten kontsulta, esteka interesgarriak…
• Azterketaren atal bakoitza lantzeko baliabideak: informazioa, azalpenak eta ariketak.
• Baliabide orokorrak: hiztegiak, kontsultaguneak, arauak lantzeko ikastaroa, ortografia eta hiztegi batua, puntuazioa, gramatika arazoak, eta hizkuntzaren aberastasuna lantzeko mota guztietako baliabideak.

Berridazketak lantzeko baliabide berriak

Atal guztietan daude berrikuntzak baina, bakarren bat aipatzearren, berridazketak lantzekoa aitatuko nuke. Covcell proiektuko kide den Ainhoa Ezeiza EHUko irakasleak emandako material batetik abiatuta (bion artean Moodle-ekoa hobetzen dihardugu egunotan), berridazketak perpaus motaren baitan sailkatuta agertzen dira (denborazkoak, nominalizazioak, zehar-galderak, koordinatuak, moduzkoak…). Esaldi mota bakoitzaren gainean klik eginez, mota bakoitzari dagozkion azalpena eta ariketa-sorta topatuko dituzue.

Ariketak Hot Potatoes-ekin eginak dira eta komeni da erantzun laburreko ariketak izan ohi dituzten mugak kontuan izatea; izan ere, edozein karaktere -hizki, tarte edo puntuazio ikur- gaizki idatzita, okertzat emango baitu erantzuna. Beraz, horiei arreta handia jarri behar zaie. Bestalde, berridazketak zuzentzeko garaian aintzat hartu beharreko beste zerbait baldineko erantzun egokien kopurua da. Erantzun zuzen bat baino gehiago egon daiteke hainbat kasutan. Dena den, EGAko aztertzaileek ontzat emandakoak baino ez ditut ipini.

Amaitzeko, berridazketak lantzeko ariketa guztiak batera egin nahi izanez gero, euskaljakintzako ariketak atalean ere -alboko barran- topatu ahal izango dituzue.

Sarean tresna didaktiko interesgarri anitz dagoela garbi dago. Horietako bat behin baino gehiagotan (1, 2, 3, 4, ) aipatu izan dugun webquest delakoa da. Webquestak, jakingo duzuen bezala, irakasleek ikasleei begira diseinatzen dituzten ikerketa-jarduerak dira. Ikerketa hori burutzeko iturri nagusia sarea izaten da. Orokorrean lan kooperatiboa bultzatzen dute, eta taldeko partaide bakoitzak lanaren zati baten ardura izan ohi du. Ondo diseinatutako jarduera bada, ikaslea gaitasun kognitiboak erabiltzera behartuko du, gaitasun kritikoa jorratuz eta ikerketaren bide zabalak irekiz. Honaino teoria; praktikan, aldiz, konturatuta nago helburu horiek guztiak bete gabe ere, irakasleoi baliagarriak suerta dakizkigukeela, horietaz gaindi, beste mota bateko jarduerak ere diseinatzeko. Horixe izan da nire azken webquestaren kasua: solasean.

Hasteko, aitortu beharrean nago, azkenaldian, aprendizaia esanguratsuarekin nahiko kezkatuta nabilela. Zenbatetan ez ditugu ikasi edo erakutsi gerora begira oso baliagarriak ez diren edukiak? Eduki horietako askok ba al du errealitatearekin eta bizitzarekin zerikusirik? Zer egin dezakegu bi horiek uztartzeko? Bada, galdera horiek buruan bueltaka, elkarrizketak lantzeko webquest hau prestatzen hasi nintzen. Batxilergo 2an jaso beharreko hainbat eduki (kontzeptu nahiz jarrerazkoak), neurri batean, ikastolatik kanpo lortzea nahi nuen. Beraz, nire asmoa, oraingo honetan, ez da izan ikasleen lan kooperatiboa bultzatzea, bakarka kalera irtenaraztea baizik, gelako paretak zeharkaraztea, alegia. Horretarako, ikasleek bi ataza egin beharko dituzte:

• Gaia, pertsonaia(k) eta hitzordua hautatu eta galdera-sorta prestatu ondoren, elkarrizketa bat egin.
• Egindako elkarrizketa euskaljakintzan argitaratzeko atondu.

Prozesua ahalik eta gehien zehazten saiatu naiz; hala elkarrizketa aurreko urratsak zehatz-mehatz adieraziz, nola elkarrizketan zehar egin behar dena eta ez argi utziz. Elkarrizketa ondorengo pausoak eta hainbat elkarrizketaren adibideak ere emanak gelditu dira. Ordenagailu bidezko ikerketa ere bultzatu nahi dudanez, elkarrizketatuek baldintza batzuk bete beharko dituzte noski (esanguratsua edo oihartzuna izan duen zerbait egindakoak…).

Bestalde, iaz proiektuak eta idazlanak baloratzeko hainbat txantiloi diseinatu (zenbait kasutan egokitu) nuen. Baloratzeko sistema ona izan daitekeela iruditzen zait eta aurten ere ildo horretatik jarraitzeko asmoa dut. Horregatik, elkarrizketaren prozesu osoa baloratzeko txantiloi bat sortu dut eta, nire ustez, hori bezain garrantzitsua izan daitekeen beste bat, ikasleen autoebaluazioarena.

Amaitzeko, esan, hastear dagoen ikasturteko lehenengo ebaluazioan eramango dugula praktikara prestatutakoa. Ea ikasleak noraino sartzen diren!

Gustu handiz egindako webgunea da Euskalnatura, hori ezin da ukatu. Oso itxura profesionala du. Edukiei begira, hauek oso modu argian azaltzen dira, ondo egituratuta dago dena eta informazio sakona eskaintzen da, argazki ugariz lagunduta kasu gehienetan. Hona hemen adibidez, sugegorriari buruz kontsulta daitekeen informazioa. Lastima oraindik hainbat atal hutsik egotea, fisika eta kimikari dagozkienak esate baterako. Ziur laster helduko diotela honi ere!

Gogoratzen dizuet ekimen hau unibertsitateko sei ikasleen lanaren ondorioa dela eta bere edukiak CC by sa lizentziapean argitaratzen direla.

Bukatzeko, gaur bertan jakin dut Euskalnaturako lagunok abian ipini dutela ere Tantaka Tantaka bloga. Blog berri honen helburua natura, ingurugiroa eta zientziaren gainean hausnarketak, irakurketak eta bestelakoak burutzea da. Zientzietako irakasleak garenontzat primerako albistea, zalantzarik gabe

Kåre Kullerud, Norvegiako Tromsø Unibertsitateko Geologia Departamentuko irakaslea da. Geologiako hainbat gai (Lurrikarak, Tektonika, Lurraren barrualdea …etab) flash modulo batzuen bidez lantzen ditu (guztira 22 modulo). Bertan idatzizko informazioaz gain animazioak daude. Moduloen barruan gaia atalka banatuta dago. Beraz modu linealean landu daiteke (atal guztiak bata bestearen atzetik) edo saltoka. Hori dela eta, moduloak “liburu elektroniko” gisa erabil daitezke.

Materiala kalitate handikoa da. Horren adierazgarri hainbat hizkuntzetara itzuli dela da (Modulo guztiak Norvegierara, Errusierara eta Ingelesera itzuliak daude; Alemanierara, Italierara, Txinerara, Gaztelerara, ….etab, aldiz, modulo batzuk bakarrik).

Axular Lizeoa Ikastolako Ingeles eta Natur Zientziak mintegiko irakasle batzuk moduloak itzultzeko konpromezua hartu dugu. Orain arte 4 modulo itzuli eta zintzilikatu ditugu. Beste pare batean lanean ari gara.
Helbidea hurrengoa da : http://www.ig.uit.no/webgeology/

Modulo berriak euskaratzen ditugun heinean abisatuko dugu.